قصيدة مسندة للاخ الشاعر قاعد بن قعدان الوهاب

يا راكبن بنزن جديدن طرازه=بديه من الفولاذ والصلب منحوت
آخر موديل ولا نقص فيه عازه=من وارد الالمان بوراق وكروت
جاين طلب ومهندس الصنف أجازه=تعمى عيون أهل الحسد عنه وتموت
ليا تله السايق وشغل جهازه=ما يغبط اللي مالكٍن قصرمريوت
وليا نهض صدره وزان امتيازه=اسرع من اللي بالفضا تسبق الصوت
عليه قرمٍن حر صعب مرازه=عاقل ومن ناسٍن لهم سمت وبخوت
ملفاك بيتن كبر أبان ارتكازه=وبه مجلسن ما فيه شامت ومشموت
بيت الليثنٍ تاج الأمجاد حازه=صميدعنٍ من شجرة الطيب منعوت
بانيه قاعد لين كمل نجازه=وعمار يا دارٍ على الطيب مثبوت
وعطه الكتاب اللي نسجته على آزه=مثايلن مني جزيلات وبيوت
وبلغ سلامي واشهره بعتزازه=سلامٍ أغلى من ذهب حص ياقوت
والذ من ذوب العسل في حجازه=وأحلى من السكر على زاكي التوت
ثم قل لبـو شارع بكل اعتزازه=الله من همن بالضلاع مكبوت
قلبي تصرم مثل صرم القزازه=وعانيت ما عانا العواجي على نوت
على وليفن هز قلبي ورازه=ولاعاد نفسي تقبل الزاد والقوت
اقفا وجاء بالصدر عقبه حزازه=هز المدافع في جنوبي بيروت
أبعد من البصرة اعن اقصى المحازه=ومن دونها ضلعان وسهول وخبوت
ولا همني بعد الديار وغرازه=همي زمانن كنه السيف مصلوت
وقتن تساوى فيه حره وبازه=والحر يشكي الضيم والريش محتوت
والذيب جر اعواه والنيص هازه=ما فيه غير اعواه والعالم سكوت
واخترت رايك وانت رايك مفازه=يا عز من جالك من الوقت مبهوت
والقول نعرف معربه من مجازه=وهذا صحيح القول والكذب ممقوت

نواف بن عبدالعزيز بن رازن